Tanah Disewa Ayia Dibali

LAWAK BAGALAU

Tanah di Sewa, Ayia di Bali

(Monolog si Pudin)

Dikarang dek : SiTampan

“Jikok disimak didanga bana, di indang ditampih tareh, dipilih atah ciek ciek iyo nan ampo ka tasisih juo. Kok mamak lai bajinih, kok bapak lai tapandang tantu isuk nasib lai ka elok, tapi kok bapak  bansek mande sansaro, mamak bukan bajinih pulo, nasib bak cando asoy tabang, angin suruik awak tasangkuik. Kok lai tasangkuik dibatang nan gadang, alamat lai dapek balinduang, tapi kok tasangkuik diranting patah, antah ka ba a nasibnyo badan.
Kecek urang usah maliek ka ateh beko mato kalimpanan, ukua diri jo bayang badan, indaklah koncek ka jadi kabau, indaklah mancik kajadi rimau.Kacau sajo gulai awak surang, usah dikacau gulainyo urang, hak bapunyo, ganggam ba untuk. Bialah ketek untuk awak asa lai berkah dari pado gadang tapi indak amanah.
Didalam pembukaan Undang undang Dasar 45 ditulih bahwasonyo cito cito kemerdekaan itu adalah untuk menjadikan masyarakat nan sejahtera.Alah 72 tahun nagari ko merdeka, nan cito cito sejahtera ko hanyo dirasokan dek urang urang nan dakek jo pamarintah sajo, sadangkan rakyat badarai nan tabantang dari sabang sampai marauke masih banyak nan indak marasoan cito cito kemerdekaan. Urang lua nagari alah bapikia ba a bisa hiduik di bulan, sadangkan rakyat badarai masih ba pikia ba a bisa hiduik dari bulan ka bulan…. Antahlah
Katiko maso sakola, masih takana bunyi Undang undang Dasar 45 bahwasonyo bumi, air dan segala kekayaan yang terkandung didalamnya dikuasai oleh negara dan digunakan sepenuhnya untuk kemakmuran rakyat. Listrik di kuasai dek negara, banyak urang nan tapakik katiko mambayia rekening listrik ko tiok bulan. Minyak bumi dikuasai dek negara, kecek urang harago BBM dinagari awak ko labih tinggi dari nagari nan indak punyo penghasilan minyak samo sakali. Nagari ko dikalilingi dek lawik tapi garam masih di import dari lua nagari. Antahlah, kama tangih kadikadukan. Kok dikadukan ka wakil rakyat nan ado di parlemen, inyo hanyo dakek jo rakyat bilo butuh suaro sajo. Alah duduk dikurisi taba, nan dipikiannyo hanyolah pitih masuk sajo. Alun tadanga sampai kini lai doh produk PERDA nan dibuek dek wakil rakyat tu nan ma untuangan urang banyak, nan ado hanyo PERDA pitih masuk se, retribusilah, pajaklah, izin ikolah. Rumah ado pajaknyo, tanah ado pajaknyo, ayia ado pajaknyo, satiok punyo kendaraan ado pajaknyo. Punyo penghasilan awak kanai pajak, indak bapitih awak kanai pajak juo. Contohnyo ado kawan malamar karajo, harus ma urus NPWP dan wajib mambayia salamo tigo bulan….. karajo antah dapek antah indak tapi awak alah kanai pajak… ndeh, Indonesia tanah airku, tanah disewa air dibeli.
Tantang carito wakil rakyat di nagari nan alah 72 tahun merdeka ko, kadang acok mambuek paruik awak marumeh, ba a ka indak? Tiok sabanta inyo kunker, rises dan antah apo namonyo, tapi hansilnyo untuk raakyat apo? Pengangguran batambah banyak, kriminal makin meledak. Contoh keteknyo sajo di nagari awak ko ampiang tiok hari ado kamalingan, parampokan, begal begalan, kini ado pulo namonyo geng motor nan siap mati untuk sok sok gengsi, antahlah..
Kok dibaco koran, amuh tiok sabanta se pamarintah daerah  ko dapek penghargaan. Harusnyo awak bangga bilo pamarintah daerah awak ko dapek penghargaan Adipura jo pengelolaan lingkungan  kapatangko, tapi raso bangga tu langsuang hilang katiko hari hujan tajadi banjir jo longsor dimano-mano. Apolai kota Padang ko, jalan di dalam kota amuh juo banjir kalau hari hujan, contohnyo jalan Aru di lubuk bagaluang, kok hujan labek agak sajam se… pasti banyak kendaraan bamotor nan mogok di sinan.
Di Kota Padang ado namonyo daerah mudik atau padang pinggir kota, dulu daerah ko adolah basis perjuangan. Hari jadi kota Padang ko ditandai katiko peristiwa urang mudik sacaro heroik manyarang loji Balando di Muaro. Harusnyo daerah nan jadi basis perjuangan dulu tu jadi prioritas untuk pembangunan infrastrukturnyo, cubolah calik didaerah mudik tu, banyak jalan nan indak ba aspal. Kok alah bana ba aspal tapi banyak nan balubang-lubang, mungkin harus ditanam pulo batang pisang dijalan,  baru dipelokan jalan tu dek pamarintah. Contohnyo masyarakat kelurahan Pisang nan mananam batang pisang dijalan didaerahnyo, kini jalan tu alah ba aspal mulus. Tapi urang kelurahan Binuang Kampuang Dalam nan indak mananam batang pisang dijalan didaerahnyo nan balubang tu, sampai kini iyo indak dipelokan dek pamarintah doh…. Antahlah.
Ado pulo nan hebat dicalik, disakola-sakola ado tapampang spanduk dilarang pungli, di spanduk tu ado gambar walikota jo wakil wali kota, iyo hebat kalau dicalik dari lua. Tapi kanyataannyo awak Cuma geleng-geleng kapalo sajo, karano walau sakola gratis tapi nan sumbangan niak niin tatap ado, sumbangan bali komputerlah, sumbangan tambah honor gurulah. Nan lawaknyo sumbangan ko batatapan jumlahnyo…. Iko sumbangan atau iyuran wajib? Antahlah, rabab se lah nan kamanyampaian.
Kalau di hetong hetong biaya nan harus dikaluakan untuk sakola, SD sampai SMA 12 tahun baraja dibangku sakola, itu kalau lai naik kelas se. Disambuang lo kuliah di paguruan tinggi, antah bara urang gaek mangaluaan pitih untuk biaya sakola, tamat sakola masih harus lo mancari uang palicin untuk masuik karajo. Jadi sakola salamoko untuk apo?. Antahlah…. Banyak sakola kini nan mangaja dunia se, sahinggo pitih nan bakuaso ateh sagalonyo.
Nagari awakko iyo lawak, mako palawak indak laku bana hahahahaa
Nagari awak ko talampau banyak bana slogan, tapi isi slogan tu hanyo lips servis sajo.Kadang kadang slogan di spanduk tu ado pulo nan lawak. Pernah ado spanduk nan tapampang di jalan raya Padang Bukittingi bunyinyo bantuk iko” Mari Kita Sama Sama Mendukun Program Pemerintah’, haaa dek saking eporia baslogan sahinggo jadi kepo, harusnyo mendukung tapi tabuek Mendukun… hahaha. Itu mungkin patando banyak urang nan mangaja jabatan nan mangunokan jaso dukun hahaha, antahlah.
Baru baru ko ado pulo  kajadian di pasa raya antaro Surang Kapalo Dinas di kota Padang jo Padagang kaki limo, beritanyo jadi viral di medsos, Bamacam macam komentar nan dibaco. Inyo antah dimano, kajadiannyo antah dimano tapi komentar komentar nan dibaco bantuak jadi saksi utama bana. Sabananyo kalau satiok pajabat ko badinas jo hati, pasti inyo bijaksana jo bijaksini, tapi kalau badinas jo kapalo sajo mako biasolah kalau inyo pijaksana pijaksini.

Alah 72 tahun Merdeka, tapi cito-cito kemerdekaan ko alun juo tacapai sapanuhnyo. Harusnyo kondisi bantuak kini mambuek urang malu kalau jadi aparat pamarintah karano nan di parintah tatap juo susah hiduiknyo, tapi kanyataannyo urang tatap balomba-lomba untuk jadi aparat pamarintah, apolai jadi pajabat di pamarintahan.

Memang susah menjadi rakyat…

Senang senang jadi pejabat…

Kalau rakyat dikejar hutang…

Pejabat di kejar uang…

Reff:

Indonesia tanah airku..

Tanah sewa air dibeli..

Pemerintah tolonglah bantu…

Kami butuh kerja bukan janji-janji…. Jreenggg”.

“Hoiii… Pudin alah baciloteh jo balagu mah….! Bantuak urang kahabisan ubek wakden calik …!” harik Munap mangajuikan si Pudin nan sadang asyik monolog sorang se dari tadi.
To be continued……..
Agus 2017

Sign up here with your email address to receive updates from this blog in your inbox.