PAK WALI… TOLONGLAH TURUN TANGAN

LAWAK BAGALAU

PAK WALI… TOLONGLAH TURUN TANGAN

Dikarang dek : SiTampan

Angan lalu paham tatumbuk, rumah nampak jalan ndak tau. Baitu bana nan sadang malando pikiran si Pudin kini Untuk mahilangkan pikiran suntuk, si Pudin ko tabik pangananyo pai raon raon surang kaliliang kota Padang,
Kok di calik dari lua, kota Padang ko iyo batambah rancak, jalan by pass sabana lapang, pantai Padang makin tacelak. Alah panek raon raon sapanjang jalan nan gadang, kini Si Pudin mamuta stang motornyo masuk kampuang kalua kampuang. Ruponyo jalan dikampuang alah banyak pulo nan ba aspal simin. Katiko Pudin masuk ka perumahan nan malewati SMP 8 di Marapalam, ampiang sajo Pudin jo motornyo  tajilapak,  kironyo jalan manuju SMP  favorit di kota Padang ko sabana parah, apolai katiko tu hari siap hujan lo…. Jalan tu alah bantuak kolam ikan lele sajo.
Dek siap hujan, jalan agak licin, ampiang sajo Pudin ma antak  nenek nenek nan bajalan bantuak dikaja setan “ Hati hatilah bajalan nek, untuang motor ambo remnyo pakam…”, kecek Si Pudin ka nenek tu.
“ Waang mancalik ambo alah gaek mah mako pakam  rem waang tu, cubo kalau ambo masih mudo pasti bolong rem waang tu…!”, kato si nenek sambia taruih bajalan.
“Ondeh mande, indak wakden se nan galau doh… ruponyo nenek tu  labih galau dari den ”, guman si Pudin dalam hati mancalik kurenah si nenek tu.
Indak taraso hari alah sore, rakuang si Pudin taraso kariang, dari jauh nampak urang manjua ayia cincau. Pudin ko baranti sabanta mamasan ayia cincau tu. Katiko alah minum sa raguk duo raguk , lewat dimuko si Pudin sorang turis nan bajalan kaki sambia manyandang ransel, antah apo isi ranselnyo tu indak penting bagi ssi Pudin doh, nan penting inyo ingin mancalikan ka urang barat tu sopan santunnyo sabagai urang timur.
“ Halloo mister, singgahlah sabanta, cubolah ayia cincau ko……”, kato si Pudin manawarkan minum ka turis tu.
“ What is this..?” tanyo si turis mananyoan ap;o nan di minum dek si Pudin.
“ Ooo. Pasti manis… manis bana ayia cincau ko mah mister, cubolah agak sagaleh” jawek si Pudin sok mangarati bana apo nan dikatokan dek turis tu.
Turis ko geleng geleng kapalo tando indak mangarati apo nan disabuik dek si pudin, “ I don’t know…”.
“ Mister… iko ayia cincau….. bukan ayia danau…. Tengak mister mah…!”, kecek si pudin agak bangih. Si turis makin geleang geleang kapalo, “ You are crazy…….” Kecek si Mister sambia bajalan maninggaan si Pudin.
“ Hoi mister, …  iyo… ayia ko sabana bagizi, usah pai dulu… cubolah agak saraguk…!”,  harik Pudin maimbau si turis, tapi si tuis tatap bajalan tanpa manengok muko  si pudin.
“ Din… ndak salah danga ambo tadi inyo mangecekan crazy. Indak gizi doh, . mungkin waang gilo kecek e”, timpal si tukang ayia cincau .
Pudin hanyo diam mandamuik se bantuak harimau damam mandanga kecek si tukang ayia cincau. Alah salasai menikmati ayia cincau si Pudin langvsuang manstarter motornyo. Karano hari masih sore, inyo indak langsuang pulang, tapi singgah dulu ka lapau Uwo Incim, ruponyo tu si Munap kawan areknyo sadang mambaco koran Haluan sambia manikmati kopi sore tu.
“ Alah batuak pejabat non job lo gaya waang mambaco koran mah Nap, apo berita nan waang baco..?”, tanyo si Pudin baru sampai di lapau tu.
“ iko berita tantang festval budaya di kota Padang, dalam wakatu dakek ko akan diadokan dek pemerintah kota Padang”, jawek si Munap sambia mambaco koran.
Pudin langsuang duduk sambia mamasan minuaman ka uwo incim. Kemudian inyo manciracau sorang se “ wakden iyo indak mangarati doh… dikecekan kota Padang ko indak bapitih, acara ceremonial acok dilakukan di kota ko, Maso ditangah kota masih ado jalan buruk, jalan ka sakola favorit lo lai, apo indak ba incek mato pejabat atau urang bapangkek nan lewat jalan sinan tu? Apo indak adoh anggota DPRD dan dakek sinan tu…? . Padahal disinan sakola favorit, tantu banyak anak anak pejabat nan sakola disitu… apo inyo indak pernah datang ma antaan anak e kasakola tu….antahalh…. badak tabali bareh indak, apolo namonyo tu..”,
Mandanga ciracau si Pudin, tarangsang lo si Munap manimpalinyo”, waang Din.. kok mangecek agak agak urang tasingguang, mungkin ado sabab mako jalan tu bantuak itu… bisa jadi nan punyo tanah indak ma izinkan atau mungkin ado sabab lain….. waang kecekan lo kota ko nan indak bapitih, kok waang indak bapitih aden picayo sajo….”.
Si Pudin ko kalau mangecek pantang kalah, draw sajo inyo indak amuh “ latakanlah ado persoalan mako jalan tu indak bisa di pelokan… latakanlah pejabat nan berwenang indak mampu ma atasi persoalan tu.. tapi awak kan ado pemimpin.. wali kota…. Urang nomor satu dikota ko… nan mahitam mamutihkan kota ko…. Suruh walikota tu turun tangan  manyalasaikan persoalan tu, intinyo ba a jalan nan saketek manuju sakola favorit tu mulus lo bantuak uda uni kota Padang ko….”.
“ Paniang den dek waang Din, lai ka mungkin wakden lo nan ka manyuruh walikota…? Sia bana wakden ko…?. Sakik kapalo den mangecek jo waang mah. Wakden pulang dulu, rumpuik jawinar den alun basabikan lai doh..” , kato si Munap sambia kalua dari lapau tu.
2017
BE CONTINUED

Sign up here with your email address to receive updates from this blog in your inbox.