LAWAK BAGALAU
Hanyo Sejarah Nan Mencintai Kota Padang
Dikarang dek : SiTampan
" Lamak dek awak katuju dek urang, itu adolah pasan moral babuek sesuatu nan bahubungan jo urang banyak. Pasan moral ko biasonyo disampaikan sacaro turun tamurun, dapek dikatokan bahwasonyo lamak dek awak katuju dek urang adolah bagian dari hukum taratik nan harus dipahami dan di amalkan. Kini banyak urang nan kajinyo santiang tapi pahamnyo indak duduk, sahinggo acok indak samo antaro perkataan jo perbuatan. Sakola tinggi hanyo untuk mancari pangkek jo kayo bukan mancari ridho nan Kuaso. Satiok urang mungkin lancar manyabuikan raso dibao naik, Pareso dibao turun, tapi kenyataan nan tajadi dinegara awak ko apo? Kok ka naik indak paralu pakai raso jo pareso doh sahinggo nan bansek samakin susah juo. Antahlah.. Indonesia tanah airku… tanah disewa air dibeli… listrik naik makin menjadi jadi…”, ciracau Pudin pagi tu sambi malatakan koran Haluan nan alah siap dibaconyo.
Tapurangah Munap mandanga ciracau Pudin ko, biasonyo inyo dalam kasaharian babuek indak pernah peduli jo urang lain doh, barajo kahati basutan dimato. Kini keceknyo alah bantuak urang partai politik nan ma incar kurisi dewan pulo.
“ Den raso Din, berita koran haluan nan tabik kini indak adoh manyingguang nan waang kecekan doh, tapi tantang bangunan tuo nan indak tarawat dikota Padang ko iyo’, kato Munap sambia ma ambik koran nan dilatakan dek si Pudin.
“ Waang bilo ka bisa pintar… kalau hanyo mambaco nan tasurek se. Mambaco ko ado tigo pakaro, mambaco nan tasurek, nan tasirek jo nan tasuruk. Waang mungkin hanyo paham tantang bangunan tuo nan jadi gudang di sekitar muaro itu sajonyo, nan pamarintah indak bisa mareseknyo karano bangunan tu milik pribadi pribadi.sahinggo program cagar budaya bangunan purbakala indak jalan di kota ko doh. Untuk waang ketahui Nap, kota Padang ko sabananyo indak mencintai sejarah doh, sejarah se nan mencintai kota Padang ko. Cubo waang pikia jo utak ketek waang tu… apo buktinyo maso parang jo Ulando dulu urang awak ko ado mambunuh Ulando? Nan nampak hanyo urang awak nan banyak dibunuh dek Ulando tu… tu kuburannyo di Lolong, di Kuranji jo pauh Limo. Apo waang pernah maliek kuburan Balando nan maningga katiko parang jo urang awak dulu di kota padang ko? Atau apo inyo satiok maningga tu mayatnyo di bao ka balando dan dikubuan disinan? Sakali lai waang pikianlah jo utak ketek waang tu” kato Pudin sambia mahiruik kopinyo nan tadadak tu.
Sabananyo marumeh paruik Munap mancalik gaya mangecek si Pudin ko, antah sia nan sadang masuk ka inyo kini, soalnyo indak saroman Pudin nan dikenalnyo sabalunnyo doh. Apolai si Pudin ko alah manyingguang utak ketek inyo pulo. Kalau Pudin ko talongsong mangecekkan inyo barutak ka ketek… mungkin alah didaram paja komah.
“Din… wakden mangecekkan tantang bangunan tuo nan jadi gudang saroman berita di koran Haluan ko… kama lo larinyo carito waang ko… manyingguang nyingguang utak ketek wakden pulo mah…?” baleh si Munap jo raso kesal nan ditahannyo.
“ Waang alah pernah ka kota Tuo di Jakarta Din? Disinan rami urang bawisata. DiPadang Kota Tuo bukan tampek berwisata tapi tampek berniaga. Kalau pemerintah ingin melestarikan cagar budaya kota tuo di Padang ko bisa sajo, walau bukan wakden walikotanyo. Kalau alasannyo bangunan tu dimiliki sacaro pribadi sahinggo ndak bisa mamuganyo karna takuik akan jadi temuan KPK? Yo ganti rugi dan gusur pemiliknyo tu. Sadang manggusur urang bansek se pamarintah talok, maso manggusur urang kayo indak talok. Kan kayo jo bansek nan mambuek bedanyo tapi hak dasar sebagai warga kota samonyo.”, jaleh si pudin sabana mantap.
“ Sia Pulo urang nan ka mamilih waang jadi walikota? siang ba wakden malam ba ambo, mangecek iyo dareh tapi bakureh maleh. Jan tinggi bana ota waang lai Din, waang pikian selah apo nan kadimakan patang jo pagi.. jan sejarah kota Padang ko pulo nan waaang pikian lai..”, baleh Munap ka Pudin.
Galak badarai si Pudin mandanga kato si Munap tu, sahinggo mambuek Munap jadi heran apo pulo nan digalakkan dek hantu aru aru ko, padahal kecek inyo indak lawak saketek alah juo doh.
“ Hahahaha.. nan den galakan Nap, gaya waang tu nan mancalik wakden dikuliknyo sajo…. Wakden walaupun bansek kecek urang tapi wakden salalu maraso kayo… karano wakden salalu mensyukuri apo nan ado. Cubo waang calik urang nan keceknyo kayo… sabananyo inyo nan bansek karano indak mansyukuri nan ado.. malah acok ma upek upek sajo. Waaang perhatian ado oknum pejabat negarako nan alah punyo kasado alahannyo tapi tatap juo minta upeti salain gaji.Ado pedagang nan kayo balindak tapi tatap juo curang dalam manimbang… banyak contoh nan lain tantang urang kayo nan sabananyo bansek karano salalu maraso indak cukuik karano indak amuh basyukur. Jadi tolong waang hargai wakden nan bansek dimato waang ko saketek.”, jaleh Munap mangecek bantuak artis sinetron nan indak lulus audisi.
Sabananyo iyolah muak Munapko mancalik gaya dan mandanga ciracau si pudin ko, tapi tapaso ditahannyo sajo” Iyolah… waaang jan paraso co itu bana. Jadi cubolah waaang tarangkan bana tantang kota Padang nan indak mencintai sejarah tapi hanyo sejarah nan mencintai kota Padang ko”, tanyo Munap ingin tahu bana isi utak Pudin ko.
“ Itu baru waang cerdas namonyo. Kota Padang ko terlalu banyak bana lembaga jo slogan nan di buek pemerintah kotanyo,.. Ado slogan Padang kota layak anak jadi kalau baranak layaknyo di Padang, ado pulo slogan Padang kota bersih tapi urang mambuang sarok masih bakalemak peyak juo, kini ado pulo lembaga baru nan dibuek namonyo Kelompok Informasi Masyarakat atau KIM, tapi nan tajadi satiok baralek banyak urang nan main KIM”, jaleh Pudin sambia ma ambik rakik kacang nan ado dilapau Uwo Incim tu.
“ Muncuang waang sumbarang bakelok se Din, beko dijahik muncuang waang tu dek pemko Padang tu. Mukasuik den apo bana faktanyo manuruik waang kota Padang indak mencintai sejarah tapi hanyo sejarah nan mencintai kota Pa
dang ko?” , tanyo Munap agak panasaran.
“ Jadi giko Nap, partamo tantang sajarah gampo, Padang ko 200-300 tahun nan lewat pernah dilando gampo gadang jo tsunami.. apo pernah carito ko disampaikan sacaro turun tamurun? Baik malalui buku pelajaran sejarah geografi anak –anak sakola atau kaba kaba lamo? Nan acok tadanga kaba Datuk Maringgih jo Siti Nurbayanyo. Kaduo Cukuik lamo VOC jo Ulando bakuaso di Padang ko, tantu inyo ado nan maningga disiko? Dima kuburan sipil urang Balando di Padang ko nan waang tau?. Katigo kalau urang Padang pernah parang jo Balando, pasti urang balando ado juo nan maningga, dima kuburan Balando tu? Lai waang tau?”, tarang Pudin makin mambuek Munap panasaran.
“ Iyo indak abeh dek wakden doh Din”, kato Munap manyarah.
“ Kecek guru sejarah den, kuburan sipil Balando di Padang ko dulunyo ado. Lataknyo di terminal lintas Andalas dulu atau Plaza Andalas kini. Kuburan tantara Balando di Padang ko dulu ado, lataknyo di kantu Dinas Pendidikan dan Kebudayaan kini atau di dakek balantuang atau jalan Sudirman kini. Ciek lai… di Pasa Banda Buek tu dulu maso agresi Balando kaduo banyak urang maningga tapi ndak adoh catatannyo sia sajo nan maningga. Alah mah.. banyak bana wakden bacarito beko dicari pulo wakden dek urang Dishubkominfo kota padang ko, di jadikan lo wakden ketua KIM kota Padang, bisa kalah lo KIM si Nedi Gampo dek den ko…. Tolong waang salasaikan minum den Nap.. den pai dulu yo”, kato Pudin sambia kalua dari kadai Uwo incim, sok yakin sajo si Munap pasti mambayia minumnyo.
To be continued……
Juli 2017
0 Response to "Hanyo Sejarah Nan Mencintai Kota Padang"
Post a Comment