Kojek Online

LAWAK BAGALAU
KOJEK ONLINE
Dikarang dek : SiTampan

Sajak kanai PHK di PT. Angin Ribuk, si Pudin iyo alah acok gana se alias indak fokus atau bahasa keren kini ko gagal paham. Ado sababnyo Pudin ko di barantian karajo, inyo dikantu alah acok kanai tegur dek bos, karano urang sibuk karajo dikantu tu, inyo sibuk lo chatingan pakai komputer kantu. Mungkin dek alah muak bos dikantu tu mancalik kurenah Pudin ko, mako katiko tu di imbau lah pudin ko ka ruangan bos.
Pudin masuk karuangan bos tu bantuak urang indak basalah sajo, “ Bos ma imbau ambo… apo nan bisa ambo bantu bos, kalau untuk bos.. apo sajo ambo siap lakukan”, kato Pudin sabana mantap bana koa. Pudin ko basikap bantuak itu karano sibos tu  ado hubungan dunsanak bako anak pisang dek inyo.
Mancalik gaya  si Pudin ko sabana marumeh paruik sibos, inyo dulu ma ajak Pudin ko karajo karano dek ibo kalau lai bisa dibina, tapi dek parangainyo dikantu alah mangganggu bana disiplin karajo mako tapaso dibinasakan sajo lai, “ Din, ambo mintak maaf, sabananyo barek ambo manyampaikan, tapi kalau indak ambo ambik keputusan, bisa lamah disiplin dikantu ko, waang ambo barantian karajo ….”, kato si bos.
Pudin ko antah lai baraja ilmu jiwa atau ilmu taratik  antah indak, alah bantuak itu bos mangecek ka inyo, inyo anggap bagarah juo lai,” Bos serius ka mamecat ambo…? Alah bos pikia bana masak masak?, untuk bos ketahui.. ambo ko  sangat berpotensi, kapatang sajo urang PLN jo urang PDAM mancari cari cari ambo, , ciek perusahaan daerah, ciek lai perusahaan negara. Perusahaan bos ko hanyo prusahaan pribadi….. pikia bana lah dulu bos….”, kato Pudin  sabana pede bana mampangaruhi keputusan bos inyo tu.
Mandanga kecek Pudin tu, si bos  mambukak  laci ma ambik amplot, “ Alah mah Din, waang carito se nan gadang, indak amuh baraja dari kasalahan. Ambo tau urang PLN jo PDAM  mancari waang tu, bukan ma ajak waang karajo dikantunyo, tapi dek waang alah manunggak tagihan ;listrik jo PDAM.  Iko uang tulak waang tigo bulan gaji, waang lunasi lah tunggakan listrik jo ayia tu. Mulai hari ko waang baranti karajo disiko”, kato si bos ma agihan amplot ka Pudin dan taruih kalua ruangan karano alah muak malayani si pudin ko.
Alah sabulan lamonyo Pudin ko indak adoh padok, mancari apo nan kadikakok, manunggu ambo nan kadiharok, rumah tampak jalan talampok, Pudin iyolah bantuak urang begok, karajonyo dirumah hanyo bamanuang jo marokok, lalok jo kuok, sahinggonyo si Lela nan jad bininyo alah acok maratok dek indak adoh lai nan kadisuok.
“ Da…. Alah mah marokok ka maroko se, sampai bana asok rokok uda tu ka langik katujuh indak ka tabukak rasaki uda tu doh kalau indak bausaho…”, kato Lela maingekan si Pudin.
“ Indak jaleh dek kau doh…. Marokok ko kecek dokter bisa menimbulkan hal-hal nan postif”. Jawek Pudin kalamak isi paruiknyo sajo.
“ Bana da.. positif kanker… kantong kering”, baleh si Lela sambia taruih ka dapua ma angekan samba kapatang.
Mancalik bininyo alah mangambok se, Pudin ko kalua rumah malangkahkan kaki ka lapau Uwo Incim. Ruponyo di lapau tu nampak dek inyo si Kojek. Kojek ko kawan lamo  samo SD jo Pudin dulu, inyo alah lamo indak mancogok dikampuang Suduik tu sajak babini ka Sijunjuang.
“ Alah lamo waang indak nampak mah Jek….  Lai hiduik juo waang lai ya”. Kato Pudin ka Kojek nan sadang mambaco koran Haluan di meja Uwo Incim tu.
“ Muncuang waang dari dulu iyo indak pernah basensor doh Din, Apo nan taragak dek waang, pasanlah, tapi ingek yo jan labih dari tigo ribu”, kato Kojek mambaleh garah si Pudin.
Pudin ko bacarito ka kojek bahwasonyo inyo alah baranti karajo di PT. Angin Ribuik. Katiko alah pasai mandanga curhat jo ciloteh Pudin, Kojek manyarankan ka Pudin tu jadi tukang ojek online sajo,” Lumayanlah Din, dari pado mangganggur, awak indak mancari panumpang doh, tapi panumpang tu nan mancari awak, syaratnyo surek KCK, Sim jo KTP, waang antaan ka Imam Bonjol tu, kantuanyo dakek situ mah… baru sabulan ko buikak di Padang”, saran Kojek ka Pudin.
Saran Kojek tu di ikuti dek si Pudin, kini inyo alah manjadi tuikang ojek online lo. Supayo panumpang suko balangganan jo inyo, mako Pudin ko sangaik manjago panampilannyo. Malah si Pudin ko kini alah salalu siap sedia jo saboto parfum isi ulang untuk mahilangkan baun katiaknyo.
Dasar si Pudin mato karanjang, dari sakian palanggannyo, adoh surang nan tingga di Gunuang Pangilun nan banamo  Ayu Ting Tong, jando nan indak baranak. Kalau mangecek jo Pudin iyo sabana manjo sarato jo mantiak e, Pudin kuciang kabak ko bapantang lo mancalik padusi bajidat licin,
“Jadi bang Pudin duda yo”, kato si Ayu Ting Tong sambia marapek ka balakang pungguang Pudin.
“ Lengkapnyo Duren Sumo… alias duda keren suko manolong….”, gombal si Pudin nan alah lupo jo kode etik malayani panumpang. Ayu  Ting Tong ko satiok sore suko bana mintak di antaan dek si pudin katampek fitnesnyo,
“ Bisuk kalau urang pilkada di Padang ko, sia nan bang Pudin pilih, kalau pilihan ayu alah pasti, bang  Pudin sorang”, kato Ayu Ting Tong marayu Pudin.
“Ayu bisa sajo…. Bia abang Pudin jadi walikota se di hati Ayu, karano babang Pudin jo Ayu alah bantuak HP jo sim card sajo”, kato Pudin ula sawah ko mambaleh gombalnyo ayu Ting Tong.
Ayu Ting Tong mamicik sanang pangka langan Pudin  karano  di gombal dek ula sawah ko, Ayu ko indak manyadari  doh bahwasonyo HP Pudin tu hanyolah HP cino, nan sim cardnyo indak ciek doh, tapi ado tigo, dan hatinyo mudah baralih raso……..

BE CONTINUED……

Sign up here with your email address to receive updates from this blog in your inbox.