Hari Pelanggan Banjir

Lawak  Bagalau

Hari Pelanggan Banjir

Di Karang dek : Si Tampan

“ Cewang di langik tando ka paneh, gabak dihulu tando ka hujan. Baitu pepatah nan acok kito danga dari urang  gaek- gaek. Kok iyo hari ka paneh jamulah padi ka jadi bareh, kok iyo hari ka hujan sadio payuang kalau bajalan. Tapi dek sakali ayia gadang sakali  tapian  barubah, tiok maso ado pulo musimnyo, maso dulu pasti indak samo jo musim kini. Dulu kalau hujan urang bapayuang payuang, tapi kalau kini  bilo hari hujan urang  basampan –sampan, khusus untuk babarapo kawasan nan jadi  langganan banjir.

Kalau tiok tanggal 4 September awak memperingati hari  Pelanggan Nasional, untuk maingekan kapado pelanggan barang dan jasa selalu kritis dalam mambali satiok barang, tapi untuk masyarakat kota Padang moment hari pelangganan nasional ko dijadikan untuk maningkekkan kewaspadaan terhadap banjir bilo tibo hujan gadang. Padang sebagai daerah langganan banjir bantuaknyo harus segera dapek pengakuan dari MURI pulo.

Biasonyo  pemukiman yang jadi langganan banjir adolah   yang dakek daerah  aliran banda gadang atau batang ayia,  dek gadang bana ayia dihulu sahinggo indak tatampuang dek batang ayia  nan adoh mako malimpah menyinggahi rumah penduduk sekitar. Tapi khusus di kota Padang, banjir ko tajadi dek limpahan  banda banda ketek atau drainase nan ado di tapi jalan atau sekitar tampek pemukiman.

Kalai dipikia di inok manuangkan, sasalah-salah ayia masuak rumah, nan salah tatap manusia juo. Ayia ko kalau indak digaduh tampek panampuangannyo dan tampek lalunyo mako pasti inyo sagan pulo masuak karumah, kaparak, kasawah atau kajalan.  Cubolah awak calik alah banyak bukik nan gundul,  banda tampek lalu ayia dijadikan tampek pambuangan sarok, malah ado pulo urang nan mambuek bangunan diateh banda”. Ciloteh Pudin di kadai Uwo Incim.

“ Waang kalau mangecek Din  kadang bantuak urang kasurupan se, kadang bantuak pengamat banjir sabana bananyo. Wakden satuju jo pandapek waang tu, sasalah salah ayia, nan salah awak juo. Urang mambuek rumah gadang-gadang, mambuek jalan gadang-gadang, tapi mambuek banda ketek ketek, jadi wajar sajo kalau satiok hujan ayia  dibanda malimpah masuak rumah”, baleh Munap mananggapi ciloteh Pudin.

“ Tapi waang kan mangecek se nan pandai, kecek jo parangai indak terhubung. Wakden acok mancalik waang mambuang sarok ka banda muko rumah waang tu”, sindie Munap ka Pudin salanjuiknyo.

Agak tasirok Pudin mandanga kecek Munap nan manyingguang puncak kadanyo. Tapi bukan Pudin namonyo kalau indak santiang basilek lidah “ Waang kan mancalik nan tampak sajo, tapi kan indak paham jo ujuik jo mukasuiknyo. Wakden mambuang sarok kabanda tu karano sadang malakukan penelitian tantang Pangaruh Mambuang Sarok Ka Banda Terhadap gadang Ketek Banjir Melanda, karano hasilnyo significan, jadi kini kan wakden ndak pernah mambuang sarok ka banda lai…”, jawek Pudin kalamak isi paruiknyo sajo.

“ Hahahaha….  Samo pulo jawaban waang tu jo kawan den si Baguang. Katiko inyo den tanyo kok marokok ka marokok se tiok sabanta, padahal rokok tu marusak kesehatan. Inyo jalehannyo bahwasonyo inyo sabananyo adolah aktivis anti rokok nan cinta damai. Dari pado dibakanyo pabrik rokok tu sebagai aksi protes, bialah di bakanyo rokok sabatang sabatang sebagai aksi protesnyo”, baleh Munap.

“ Tapi Nap, untuk waang ketahui, marokok tu bisa menimbulkan hal-hal yang positif, positif sakik jantuang, positif paru jo positif kanker alias kantong kering hahahaha”, baleh Pudin indak amuh kalah.

“ Tantang banjir tadi Din, harusnyo jadi pelajaran bagi awak kasadonyo. Indak usah saliang manyalahkan, intropeksi diri jo peran masiang-masiang. Pasca banjir  di Padang ka patang, ambo danga pamarintah kota mengintruksikan kapado camat jo lurah  sarato RT jo RW untuk mamotori  gotong royong  dilingkuanan masing-masiang. Wakden kan sato pulo bagabuang bagotong royong, waang nan indak nampak puncak iduang waang tu Din. Jadi pantas sajo ayia banda malimpah, alah banda ketek, didalam banda tu ikan jo udang indak ado lai doh, nan adoh Cuma sarok, plastik, pampers, pokoknyo sagalo sarok rumah tanggo lengkap ado di dalam banda tu”,  kecek Munap  manjalehkan ka Pudin.

“ Soal itu wakden lai peduli juo, malahan wakden pernah mambuek plank pengumuman dakek banda tu, DILARANG BUANG SAMPAH DISINI KECUALI ANJIR. Tau waang ndak, sudah tu inyo inyo indak mambuang sarok ka banda tu lai doh, tapi anjirnyo yang disuruh mambuang sarok disinan…..”, kecek Pudin sok –sok kesal pulo jo kurenah urang nan suko mambuang sarok ka banda.

“ Harusnyo awak harus bakarajo samo manjago kota awak ko supayo bebas dari banjir kedepannyo, kota Padang  Tercinta Kujaga dan Kubela ko,  kok tatap juo awak jadi pelanggan banjir  mako samo samo bela awak manjago kota Padang ko mah”, kecek Munap sambia mahiruik kopinyo nan mulai tadadak.

“ Kalau wakden ba andai andai Nap, alah bantuak iko   kajadian, seandainyo anggota dewan jo pamarintah ba iyo-iyo  manyadiokan anggaran nan agak gadang untuk mambuek jo memperbaiki saluran ayia,  terutamo ditampek nan jadi langganan banjir, tandu kedepan kota Padang ko akan terbebas dari banjir”, Kecek Pudin sok paham bana lo lik.

“ Umpamo anggota dewan tu ba iyo-iyo jo pamarintah ma anggarkan mambuek jo memperbaiki saluran ayia didaerah nan jadi langganan banjir tu, tatap juo indak adoh gunonyo doh kalau masih mambuang sarok ka banda”,  jawek Munap.

“ Pokoknyo samo-samo manjago awak, indak samo samo bela doh….   Awak buek  GEMA KABE, ba a kiro-kiro?”,  usul Pudin ka Munap”

“ GEMA KABE? Kama pulo larinyo, apo pulo hubungannyo banjir jo urang baranak?”, kecek Munap binguang mandanga usulan Pudin.

“ GEMA KABE tu mukasuiknyo Gerakan Mandiri Kali Bersih……..”, jawek Pudin jo nada agak tinggi,

TO BE Continued.

Sign up here with your email address to receive updates from this blog in your inbox.