Pantun Naik Gaji

Lawak Bagalau

Pantun Naik Gaji

Dikarang dek Si Tampan

“Tambilang dilubuk lansek, tasisik diliang lantai, dibilang sado nan dapek, nan tingga untuk rang pandai. Manolah ninik mamak, alim jo ulama sarato jo urang cadik pandai, dek dilangik alah takaba, tibo dibumi jadi berita. Kaba dibaco dari koran, koran kebanggaan urang awak, ditulih dek wartawan Haluan, wakil rakyat kini alah basorak.

Kain hitam colok bangkinang, ditanun anak ayia bulek, ka unduang unduang pai mandi, nan basorak tantu sabana sanang,  etan  dipintak sabana dapek, karano kini  gaji alah naik . Bakumpu manti jo dubalang, di istano ujuang gadiang, mananti titah dari rajo, dimalah hati indak kasanang, cegak sagalao ngilu jo paniang, wakil rakyat kini samakin kayo.

Ba a kiro-kiro pepatah petitih wakden  Nap, lai mantap? Lai bisa wakden  masuk rekor muri lo? Pantang kalah lo denai  jo gubernur awak kini?”, kato Pudin siang tu dilapau Uwo Incim.

Munap tagili gili sanang mancalik kurenah Pudin nan barusan bapantun, indak disangkonyo  tanyato baruak gadang ko pandai lo pepatah petitih, sebuah kebiasaan nan alah mulai ditinggaan dek generasi mudo Miangkabau.

“Jujur Din, lain hebatnyo gubernur awak bapantun, lain lo hebatnyo waang, kalau nan waang baoan tadi namonyo pantun tradisi, kalau gubernur awak inyo bapantun melayu, bahasanyo Indonesia Raya. Jadi antaro waang jo gubernur bukan samo samo bakalainan, tapi samo-samo hebat. Lain hebat waang, lain lo hebatnyo gubernur, namun gubernur tetap lebih hebat dari waang…?, jawek Munap.

“Ado nan taraso dihati nan takili di lidah wakden ko, wakden bangga punyo gubernur pandai bapantun, tapi pertanyaan wakden… apo gubernur awakko indak pandai bahaso Minang? Kalau inyo Pandai bahaso minang tantu pantunnyo babahaso minang lo?”, kato si Pudin dengan sok polos pulo.

Mandanga pertanyaan Pudin nan rada rada agak kritis tu, agak tasentak juo Munap. Sebagai  urang Minang nan peduli jo pewarisan dan pelestarian adat budaya iyo agak amba hati Munap mancalik kondisi kini. Urang awak ko masih ado nan sok kebarat-baratan, malah pejabat pejabat didaerah ko bantuak itu pulo. Nan jadi catatan dek Munap sebagai pemerhati budaya  lokal, satiok ado ivent nan maundang tamu-tamu dari lua daerah atau lua nagari, nampak bana dibaco dibrosur, spanduk atau balihonyo istilah bahasa asiang sajo. Sabananyo indak ba a gai doh pakai istilah bahaso asiang asa ditulih lo arti mukasuiknyo jo bahasa Minang.

“Mandanga tanyo waang nan takah tu, iyo bana pulo. wakden acok mancalik ivent-ivent budaya didaerah awak ko pakai istilah bahaso asiang, kecek urang urang santiang bahasa ko manunjukan budaya, tapi nan bahasa awak indak kalua doh satiok ivent budaya tu, nan kalua bahaso Inggirih jo bahasa Indonesia se. Baik di brosur, di spanduk, di baliho atau di pidato pidato pembukaan ivent budayo tu bagai…..  antahlah, indak mangarati lo wakden doh Din”, kato Munap manjalehkan.

“Wakden labih indak mangarati lo lai, katiko urang mangecekan Lubuk Bagaluang jo Lubuk Begalung,  Ayia Cama jo Air Camar, Limau Manih jo Limau Manis, Sungai Bangek jo Sungai Banget,  Ikua Koto jo Ikur Koto, Bunguih Taluak Kabuang jo Bungus Teluk Kebung… antahlah Paniang den mamikiannyo”, baleh Pudin sakalamak isi paruiknyo se.

“ Bak kecek pantun Din; urang basorak ditangah balai, kantang laku karambia abih, pemerintah iyo sabana pandai, pandai mambuek rakyat manangih. Ndak duo pantun sairiang; Cubadak balakak lakak mantimun batali tali, rakyat disuruh mambayia pajak, karano angku damang harus digaji…”, kecek Munap bapantun pantun pulo.

“Kalau Pandapek den Nap, jikok wakil rakyat mintak naik gaji, itu sah sah sajo, karano apo dibali kini sabana maha, gaji didapek abih disetor ka partai, alun lai urang mambuek acara tiok sabanta minta sumbangan, ditambah biaya papan bungo satiok urang maundang baralek. Uang kalua wakil rakyat tu iyo sabana gadang. Mungkin nan ditarimo salamoko indak cukuik, mako wajarlah wakil rakyat naik gajinyo disetujui dek pamarintah”, kato Pudin sok paham bana lo tantang pangaluaran wakil rakyat.

“Wajar kecek waang? Gaji inyo se nan dipikiannyo? Gaji awak lai dipikian pulo? Lai tau waang Din… satiok bausaho awak kini pajak dimintak, masuk malamar karajo se harus ma urus NPWP dulu. Kok adoh pitih amuh se diagihnyo, kok pitih ndak ado pajak apo nan ka diagih?” baleh Munap agak emosi, bantuak urang nan mambayia pajak lo tiok bulan.

“Saba Nap… jan emosi jiwa lo. Dinagari awak alah biaso rakyat dikaja hutang dan pejabat dikaja uang. Tantang anggota dewan nan gajinyo alah disetujui naik dek pamarintah tu, jaan waang pikian bana. Karano jadi anggota dewan tu bali bareh indak bara doh, uang pergaulannyo iyo gadang. Satiok musim ado masonyo. Maso inyo sadang bakuaso bialah inyo mandi uang, nan waang kan lai acok lo mandi kembang mah”, garah Pudin ka Munap.

“Sabalah ka sabalah juo kecek waang lai, sabalah kida alah sansai, sabalah suok alah marasai, sabalah ma a juo nan nampak dek waangh lai?”, jawek Munap ka Pudin agak emonsi jiwa.

.”Sabaaaa… indak sabalah doh…!. Kini, Pado waang marunguik marungik se bantuak urang maruyan, elok waang pai  ka bursa tenaga kerja nan sadang  diadokan dek pamarintah, waang lamar karajo disinan. Bulih badasi pulo waang patang jo pagi. Iko indak…. Siang dilapau, malam disurau, urang maliang waang taimbau…..   makonyo berang juo si Budiman ka waang. Cubo waang tiru si Budiman anggota dewan tu, nan berang jo urang nan duduk bakoa dilapau….”, Jaleh Pudin katalingo Munap.

“Dinas tenaga kerja tu karajonyo mangaluaan surek kuniang se, mancatat urang nan manganggur, tu diumumkannyo dimedia masa, bahwasonyo angka pengangguran di Sumbar sekian persen. Pado den pai ka sian, elok den pai kaparak karambi jo parak pisang lai, pulang adoh juo nan den bao pulang”, jawek Munap malapehkan uneg-unegnyo.

Vanile dalam juadah, batele indak amuh sudah, saroman itulah kurenah Pudin jo Munap kalau alah basobok. ……..

To be continued. Padang 24 Agustus 2017

Sign up here with your email address to receive updates from this blog in your inbox.