Merdeka Lo lik...!

Dikarang dek Si Tampan

Siang. Hari paneh garang, si Pudin sangajo pai ka kota mambali bendera Merah Putih untuk ditagakkan di muko rumahnyo. Di sapanjang trotoar yang diparuntukan untuk urang nan bajalan kaki di pakai dek tukang galeh bendera tu ma majangkan galehnyo. Mungkin dek awak alah merdeka inyo merdeka lo manggaleh di ateh trotoar. Tapi alah jadi kakobeh lo mah, kaki limo biasonyo manggaleh di ateh trotoar. Kadang kadang kaki ampek nan digalehkan dek kaki limo ko, kaki duo nan tukang balinyo hehe..

“Bendera nan ukuran sadang tu bara bali e da….”, kecek pudin ka tukang galeh bendera tu.

“ nan itu tujuh puluh limo ribu…”, jawek tukang bendera .

“ indak kurang da, harago pas sajo lah da” kecek Pudin manawar harago, kok lai masih bisa kurang.

“ Ondeh sanak, iko bendera Merah Putih, Bendera NKRI…..! indak tau sanak ? NKRI harago mati, indak bisa ditawar tawar”, jawek tukang bendera sambia mangaja pambali lain nan baru datang.

Marumeh paruik Pudin mandanga jawaban tukang bendera tu, sok sok paham bana jo pilar pilar kebangsaan, nan digalehnyo bendera tapi lagaknyo bantuak urang politik nan manjua  aset negara lo.

Pudin ko walau tingga di Kampuang  Suduik,  sajak nagari merdeka jalan kakampuang inyo tu indak pernah diaspal, tapi soal kecerdasaan dan wawasan inyo cukuik lumayan, sayang cerdasnyo tu bilo mangecek se, kalau karajo acok panggaliie.

Bagi Pudin nagari ko ko iyo alah merdeka sacaro de vakto, tapi dalam keseharian rakyat ko banyak indak indak menikmati merdeka nan sabananyo. Cubo bayangkan alah tujuh puluh duo tahun awak merdeka, satiok hari kemerdekaan awak sibuk marayakannyo jo lomba tarik tambang jo panjek pinang. Dilain sisi urang nan bakuaso  saroman bakompromi jo urang asiang untuk untuk menguras tambang-tambang nan ado diparuik bumi Indonesia ko. Kok iyo hasil bumi jo kekayaan nan takanduang didalamnyo dikuasai dek negara dan digunoan untuk kesejahteraan rakyat, tantu rakyat Indonesia ko alah kayo atau jalan kakampuang suduik tampek tingga inyo alah ba aspal, “ antahlah, awak sibuk lomba tarik tambang, urang sibuk lo manggali hasil tambang negara awak ko”, kecek Pudin mambatin.

Dek nan dituju alah sampai, nan dicari alah dapek, bendera Merah Putih alah siap ditagakkan dimuko rumah si Pudin, inyo taruih singgah kalapau Uwo Incim, malapeh panek, menikmati kopi satangah. Dilapau tanyato si Munap sadang asyik bana mambaco koran Harian Haluan nan jadi langganan urang lapau Uwo  Incim tu.

“ Apo  nan waang baco dikoran tu Nap, basitungkin bana waang mambaconyo?’, tanyo Pudin ka Munap sambia manyasok kopi satangahnyo.

“Antahlah Din, awak punyo lawik laweh tapi garam didatangkan dari lua nagari, awak punyo hasil bumi tapi minyak tatap juo dibali kalua nagari, awak punyo tambang ameh, tapi nan manikmati hasilnyo urang asiang. Urang asiang digaji tinggi dinagari ko,  urang awak jadi PRT di nagari asiang…..”, komentar Munap  sambia malatakkan koran nan siap dibaconyo.

“ Tinggi bana carito waang mah Nap, wakden tadi pai kapasa mambali bendera, sapanjang jalan nan den lewati banyak urang nan mamintak sumbangan, kecek inyo untuk memperingati tujuh baleh agustus. Harusnyo satiok tujuh baleh agustus ko banyaklah pitih masuk, iko nan banyak pitih kalua se.  Bukan den pilik, kok indak adoh apo nan ka diagih?”. Baleh Pudin malapeh uneg unegnyo nan ampiang bacakak jo urang nan mamintak sumbangan dijalan tadi nan mangecekkan inyo pilik.

“ Dek wakden takana carito urang gaek-gaek zaman sa isuk, sasusah susah hiduik sacaro ekonomi, sacaro agamo jan sampai iman awak tagadai, nan penting tatap bausaho, apopun hasilnyo awak syukuri, walau hanyo dapek makan sakali sahari. Tataplah punyo harago diri, jan sampai manjua diri”, kecek Munap bantuak urang bapaham bana.

Uwo Incim agak tapurangah mandanga Carito urang nan baduo ko, biasonyo kalau Pudin jo Munap ko bacarito, walau  caritonyo sapanjang tali baruak, tapi isinyo hanyo sapanjang tali sapatu. Alah  tujuh puiuh limo tahun umua Uwo Incim ko, inyo alah marasoan susahnyo zaman penjajah jo zaman bagolak. Walau kini nagari ko indak dijajah dek bangsa asiang lai, tapi penjajahan dalam bantauk lain ka Bangsa Indonesia ko tatap dilakukan dek bangsa asiang melalui narkoba, budaya jo paham-paham nan aneh-aneh nan mambuek bangsa Indonesiako makin jauh jo akar budayanyo dan jadi lemah dan mudah dikuasai.  

“Bana kecek waang Nap, dulu dek ulah bareh satekong paham jo keyakinan bisa barubah. Kapatangko Uwo mandanga babarapo daerah di Padangko ado urang nan ka mambagi-bagi pitih simpanan Sukarno di Bank Swis, pitih ko kabanyo jumlahnyo alah ribuan triliun, satiok urang nan mandaftar untuk mandapekan pitihko harus stor tigo puluh limo ribu surang sebagai uang administrasinyo, kabanyo beko satiok urang nan mandaftar dapek limo baleh juta surang. Untuang kamanakan kamanakan Uwo nan babini kalua kampuang ko alah Uwo agiah tau jan sato-sato lo, indak dapek pitih indak anti, sumbarang se main tando tangan beko bedo urusannyo, alah hiduik susah makin susah se jadinyo.”, carito Uwo Incim ka Pudin dan Munap.

“Jadi manuruik Uwo… apo bana hakekat kemerdekaanko?’ tanyo Pudin Ka Uwo Incim.

“ Merdeka tu bebas, bebas dari penjajahan dan ba iyo iyo ma urus bangsa awak ko. Kepentingan negara diateh sagalonyo untuk kemakmuran rakyat. Kini kebebasanko alah banyak disalah artikan. Kepentingan pribadi dan kelompok nan diutamokan. Alah tujuh puluh duo tahiun awak merdeka tapi jalan ka kampuang ko bantuak iko juo dari dulu, nan bansek makin bansek, nan kayo makin kayo. Dulu politilus dinegarako dizaman merebut kemerdekaan adalah negarawan, kini politikus nan hiduik dizaman kemerdekaanko banyak nan bapolitik panjek batang pinang.  Untuk naik ka ateh harus dipijak kawan dibawah, tibo diateh inyo teriak Merdeka dan bebas babuek sakandak hatinyo. Politikus nan mamikian kesejahteraan rakyat lai ado juo, tapi kalah suaro taruih se dek politikus nan panjek batang pinang ko.  Jadi sabananyo awak iyo alah merdeka tapi alun menikmati tujuan kemerdekaan tu lai, saroman nan ditulih di pembukaan Undang Undang dasar negara awak ko…..”, jaleh Uwo Incim panjang lebar.

“Jadi supayo politikus ko jan bapolitik panjek pinang, manuruik Uwo dilarang sajo panjek pinang ko?, kecek Pudin panasaran.

“Panjek pinang ko sabananyo indak ka adoh, kalau alat bukti satiok pelaku nan panjek pinang tu disita dek negara, bukan dikebiri sajo, tapi disita dek negara….!.  tapi nan panjek batang pinang bulih-bulih sajo… hahahaha”.  Bakuai galak urang salapau tu mandanga garah  Uwo Incim .

“ Hahahaha….. Buah sampelo di ateh pilin…Merdeka Uwo Incim….!”,  kecek Pudin sambia mambayia minumannyo …..

To be Continued

2017

Sign up here with your email address to receive updates from this blog in your inbox.