Pilkada Jo Pilkabe

LAWAK BAGALAU
PILKADA JO PIL KB
Dikarang dek : SiTampan

Pilkada DKI putaran kaduo alah salasai, kini manunggu putusan KPU sia nan ka dilantik jadi gubernur di Ibu Kota Republik Indonesia ko. Nan jadi sorotan utamo  pasca pilkada tu bukan janji-janji pihak nan manang, tapi janji tim sukses salamo maso kampanye. Ado nan bajanji kalau jagoannyo kalah siap malompek dari tugu monas. Ado nan siap mangarek talingo dan ado lo nan bajanji ka mangarek payudaranyo…  ondeh, mangecek kalau indak jo utak ketek iyo awak surang nan takabek. Kalau paja padusi nan mangecek siap mangarek payudaranyo bilo jagoannyo kalah jadilah karano payudaranyo kanai kanker stadium ampek, kalah atau manang bana jagoannyo, pasti juo ka dikarek punyo inyo tu.
Kalau di Padang, angin pilkada ko alah mulai pulo taraso, kabanyo tahun duo ribu lapan baleh ka dihoyak lo lik pilkada di kota Padang. Kini sajo alah banyak nan kasak kusuk untuk manyiapkan diri untuk maju jadi calon wako dan wawako.Sabananyo iyo indak mudah untuk mancalonkan diri di pilkada, aturannyo rumik dan pitihnyo harus bakawik kawik pulo.
Siang tu, dikadai Uwo Incim, nampak oto rancak bakilek baranti, Munap nan sadang duduk mangopi disinan sabana takajuik mancalik urang nan turun dari oto tu. Bantuaknyo sabana takah bana, pakai kaco mato hitam jo sipatu salerno.Raso takajuik Munap jadi galak badarai katiko tau sia nan tibo tu.
“ Sangko den sia pulo tadi, ruponya waang Din. Takah bana penampilan waang kini Din, bantuak calon calon nan ka ikuik Pilkada, masuk kampuang kalua kampuang tebar pesona….”, sindie Munap ka buyuang nan baru tibo dilapau Uwo Incim tu.
Pudin indak langsuang  manjawab sindiran Munap, sambia duduk inyo mamasan kopi satangah dulu. Kopi nan di pasan haragonyo hanyo tigo ribu tapi hiruiknyo sabana ma idu, tutrun naik lo jakun jakun Munap mancalik caro Pudin maraguk kopi tu.
“ Tadi waang mangecek Nap, penampilan wakden kini bantuak calon nan ka ikuik pilkada, lai dari hati ketek waang tu nan mangecek , alah pandai lo waang manggadangkan hati tungau kini mah”, kato Pudin sambia maminum kopi satangahnyo.
“ Kok ka calon ikuik pilkada waang iyo takah Din, tapi waang alun Tokoh lai, urang hanyo kenal jo waang dikampuang suduik iko sajo, dilua urang ndak kenal jo waang doh, waang ukulah bayang bayang waang tu, waang baru bingkaruang, urang alah buayo….”, kato Munap mamanehan hati si pudin.
“ Muncuang waang iyo ndak ba bandrol doh Nap, alah waaang ambuang den tinggi, kini waang antakan lo den kabawah lai.Wakden tadi dari kantu samsat, mambayia pajak oto, batangka lo den tadi dikantu samsat tu . Inyo sarankan dek urang samsat tu supayo oto ko di balik namoan, ma pulo den amuh….”,  jawek Pudin manjalehan ka si Munap.
“ Urang samsat manyarankan oto nan waang bao ko dibalik namoan, apo pulo nan waang patangkakan…?, tanyo Munap jo kaniang bakaruik.
“ Ba a indak batangka jo marabo ambo ka urang samsat tu, jaleh nan punyo oto ko dulu namonyo MAYA UKI, disuruh dibalik namonyo, tu jadi IKU AYAM…… mano pulo wakden amuh…!”. Kato Pudin agak mamburangsang.
Badarai galak si Munap mandanga carito Pudin tu, “ Den sangko waang lai santiang Din, kironyo sintiang.. hahahaha, mukasuik balik namo tu, diganti namo nan punyo oto dulu tu jo namo waang  sebagai pemilik baru…”.  Jaleh Munap sambia manahan galaknyo.
Pudin manjalehan ka Munap bahwasonyo nan punyo oto tu kawannyo samo sakola dulu di SMP, kini alah sukses inyo dirantau. Kini kawannyo tu alah di Padangko, inyo barencana ka ikuik calon walikota di Pilkada bisuk. Manuruik Pudin, kawannyo nan ka maju jadi calon walikota tu maraso punyo tangguangjawab untuk mambangun kota  Padang ko. Banyak yang harus dibenahi di kota ko, mambagun infrastruktur kota sangat paralu, tapi mambangun SDM dikota ko jauh lebih paralu.
“ Ndeh… hebat waang yo Din, alah bakawan pulo jo calon walikota. Tapi pandapek den Din, indak dikota Padang iko sajo doh, tapi umumnyo dikota mano sajo di Indonesia ko nan tajadi iyo gencar-genjarnyo mambangun SDM ko… makonyo nan kayo makin kayo, nan bansek makin marano.” Jawek Munap mancibie ka Pudin.
“ Kalau SDM dibangun, tapi banyak juo warga nan bansek, pasti akhlak  jo agamonyo nan tipih, utaknyo hanyo ilmu dunia jo pitih sajo, indak amuh peduli jo berbagi”, kato Pudin ma ingekan ka Munap.
“ Waang baru bakawan jo urang nan kamancalonkan diri jadi walikota, alah sok paham bana… SDM den mukasuik tu Selamatkan diri Masiang masiang………………!”, jaleh Munap jo nada agak tinggi.
Pudin ma angguak angguak mandanga kecek Munap. Kalau dicalik kini iyo banyak tajadi urang bakaja kaja mancari pangkek dan manggunokan pangkek tu untuk kepentingan diri jo kroni kroninyo. Banyak janji janji manjalang dapek pangkek tu basampaikan, tapi kalau pangkek tu alah dapek, mako janji tingga janji, bulan madu hanyo mimpi, hehehe.
“ Kalau di pikia pikia Nap, Pilkada jo Pilkabe  beda beda tipih bana”, kato Pudin ka Munap.
“ Mukasuik waang apo Din” tanyo Munap panasaran mandanga kecek Pudin.
“ Itulah waang, gaya sok tau, ruponyo tempe sajo nan waang tau. Mukasuik wakden Pilkada jo Pilkabe beda tipih bana…. Kalau di Pilkada inyo jadi mako pasti lupo, tapi kalau di Pilkabe lupo pasti manjadi”, tarang pudin sabana santai.
BE CONTINUED……
2017

Sign up here with your email address to receive updates from this blog in your inbox.